> ## Content Index > Fetch the complete content index at: https://200ok.babilabs.com/llms.txt > Use this file to discover other available public pages before exploring further. # 四國 德島｜大鳴門橋遊歩道 渦の道 - URL: https://200ok.babilabs.com/shikoku-naruto-whirlpools/ - Published: 2026-11-08T13:18:24.000Z - Updated: 2026-11-08T13:18:24.000Z - Author: 霸豬 - Tags: 四國, 鳴門, 旅遊 德島鳴門漩渦喺世界三大潮流之一。咁有邊三大潮流呢？ 1. 鳴門海峽的潮流 2. 意大利的墨西拿海峽 3. 加拿大的西摩海峽 鳴門海峽大潮嗰陣流速最快可達到時速 20 公里，亦係日本流速最快嘅潮流。呢個漩渦好似唔睇唔得🤣 安排行程嗰陣都諗緊應該點好。因為本身係諗住去到德島就還車，然後搭JR返高松。但係睇睇下搭車去鳴門都唔係易事，加埋帶住兩老，都係揸車去鳴門，然後再返高松還車方便啲，所以就自駕去鳴門住返晚！ 本來係諗住返高松嘅朝早去睇完漩渦先，所以冇打算搭船近距離睇漩渦（驚暈船浪又要揸車就好麻煩）。點知喺返高松前一日嘅活動時間比預計有鬆動之餘又早咗，再睇埋個大潮時間，哇，啱啱好揸到過鳴門就係大潮時間呀！第二日都冇咁好呀！於是就將個行程再調，嘭嘭聲飛奔去鳴門趕喺大潮時間睇最厲害嘅漩渦！ 🌟 推薦度：★★★★★ ⌛ 是次停留時間：大約 1 小時 🚗 交通：自駕，於鳴門公園駐車場泊車，步行約 5 分鐘即達渦之道入口 🅿️ 泊車：JPY 500 全日，鳴門公園駐車場1/2/3（視乎當時情況會有工作人員指示） 在場工作人員好好咁同我講呢個停車場行去渦之道大約 5 分鐘。泊好車之後沿住指示牌行去大鳴門橋方向，上個小小嘅山坡又落個小小嘅斜路又行少少平路，就到渦之道售票處，沿路風景好開揚。 ![鳴門漩渦 大鳴門橋遊歩道 渦の道](https://storage.ghost.io/c/fd/b2/fdb2159e-3755-4640-b47e-46ee4e71db38/content/images/2026/11/3-1.jpg) 鳴門漩渦 大鳴門橋遊歩道 渦の道 ### ｜大鳴門橋歷史小故事 📜 原來大鳴門橋原本係設計成公路＋新幹線鐵路雙層兩用橋，打算俾火車直接由本州經淡路島過四國。呢座橋喺 1985 年通車，點知後尾連接神戶同淡路島嘅明石海峽大橋改咗做純汽車行駛嘅公路橋，導致大鳴門橋橋底預留俾新幹線行嘅空間就咁空置咗。德島縣政府覺得條橋底空間咁樣丟空實在太浪費，於是喺2000年將原本留俾火車行嘅橋樑下層結構，改建成 450 米長嘅海上散步道「渦之道」啦～ 好快就嚟到渦之道入口。 ![鳴門漩渦 大鳴門橋遊歩道 渦の道](https://storage.ghost.io/c/fd/b2/fdb2159e-3755-4640-b47e-46ee4e71db38/content/images/2026/11/2-1.jpg) 鳴門漩渦 大鳴門橋遊歩道 渦の道 ### ｜最佳觀賞漩渦時間🌊 出發前上網做功課，見到有啲人話大潮去都睇唔到漩渦，認真查清楚先知，**大潮先係潮差最大、水流最急、漩渦最巨型最值得去嘅日子！** 咁點解有人大潮去會食白果？因為漩渦唔係 24 小時都有，佢都係跟潮汐漲退有關。漩渦只會喺每日兩次滿潮同乾潮高峰前後約 1 至 1.5 小時出現。如果喺兩次潮汐中間嘅平潮（即係轉流嗰陣）去到，就算當日係大潮，海面都只會係風平浪靜。所以記得check清楚啲時間先好去！ 💡 可以喺呢度check潮汐時間：[https://www.uzunomichi.jp/tide-calendar/](https://www.uzunomichi.jp/tide-calendar/?ref=200ok.babilabs.com) ![鳴門漩渦 大鳴門橋遊歩道 渦の道](https://storage.ghost.io/c/fd/b2/fdb2159e-3755-4640-b47e-46ee4e71db38/content/images/2026/11/7-1.jpg) 鳴門漩渦 大鳴門橋遊歩道 渦の道 ### ｜鳴門漩渦係點形成？🌀 搵下資料參考返官方嘅說法： 💡 鳴門漩渦發生於德島縣鳴門市和兵庫縣淡路島之間的鳴門海峽，是漲退潮時，海水經過瀨戶內海和紀伊水道所形成的水位差，以及海底地形複雜的原因，潮水在海峽間快速流動時產生的自然現象。春秋季的大潮時節漩流最大時，產生的漩渦直徑可達20m，因此，鳴門漩渦在規模上被認為世界第一，每天潮流最快的時間帶是最容易產生漩渦的時候，海水沒有產生流動的時候不能看到漩渦。 資料來源：[大鳴門橋游步道渦之道](https://www.uzunomichi.jp/lang%5Fzh-tw/?ref=200ok.babilabs.com) 結論係真係實在太好彩啲時間撞到正～🤣 買完飛入閘，就會沿住全長 450 米，建喺大鳴門橋鋼架結構入面嘅封閉式海上步道一路行出去海峽正中心。兩邊係透風嘅金屬網窗，一邊行一邊聽到頭頂橋面有大貨車行過嘅轟隆聲，同埋腳下海峽呼呼聲嘅海風聲，加埋啲網窗通㝫勁食風，凍少少嚟都吹到變雪條。建議帶返件有帽風褸擋下風好啲。 ![鳴門漩渦 大鳴門橋遊歩道 渦の道](https://storage.ghost.io/c/fd/b2/fdb2159e-3755-4640-b47e-46ee4e71db38/content/images/2026/11/6-1.jpg) 鳴門漩渦 大鳴門橋遊歩道 渦の道 沿途仲有幾個休息位，同埋鑲咗喺地板嘅強化透明玻璃可以畀你望落下面睇漩渦，行到最盡頭都有幾塊。咁高望落去都咪話唔驚😅 ![鳴門漩渦 大鳴門橋遊歩道 渦の道](https://storage.ghost.io/c/fd/b2/fdb2159e-3755-4640-b47e-46ee4e71db38/content/images/2026/11/5-1.jpg) 鳴門漩渦 大鳴門橋遊歩道 渦の道 ![鳴門漩渦 大鳴門橋遊歩道 渦の道](https://storage.ghost.io/c/fd/b2/fdb2159e-3755-4640-b47e-46ee4e71db38/content/images/2026/11/4-1.jpg) 鳴門漩渦 大鳴門橋遊歩道 渦の道 雖然冇見到啲旅遊節目影出嚟咁震撼嘅視覺享受，但係見到呢啲自然奇觀都大為讚嘆呢！ --- ### ｜大鳴門橋遊歩道 渦の道 - 🕐 開放時間：09:00～18:00（10月至2月為 09:00～17:00，黃金週及暑假為 08:00～19:00；最後入場為關門前30分鐘） - 🗓️ 定休日：3月、6月、9月、12月嘅第2個星期一 - 💰 門票：大人 510 日圓 / 中高生 410 日圓 / 小學生 260 日圓 - 🌐 官方網站：[https://www.uzunomichi.jp/](https://www.uzunomichi.jp/?ref=200ok.babilabs.com) - ⚠️ 注意事項：出發前務必先上官網查閱每日潮見表（最佳觀潮時間），揀準滿潮或乾潮前後 1 至 1.5 小時內入場先睇到漩渦🌀！