四國 高知｜鮮魚一八
講真成個trip最期待嘅就係呢個鮮魚一八食堂。淨係睇人哋post出嚟啲相都真係流哂口水🤤。鋪頭會根據當日漁獲多唔多而決定開唔開門⋯⋯所以都有啲擔心會唔會冇得食！但係真係好好彩，嚟到嘅時候佢有開門呀！！！雖然今次因為當天漁獲唔太多，所以食唔到超想食嘅爆炸多魚生丼飯（盛り盛り丼）。最後食咗鰹魚半敲燒蓋飯（わら焼きたたき丼），大滿足呀！
💡
自駕去土佐清水／足摺岬一定要嚟！鰹魚厚切爽口零腥味，性價比爆燈
揸車嚟到門口嘅時候大約1點左右，門口排哂人等位。泊好車之後就寫低個名然後靜心等待～大約等5張枱，前面有2枱仲要係5-6個人 😆 不過大家都係食完個丼就走了，大約等咗45分鐘就有得食！
｜わら焼きたたき丼 鰹魚半敲燒丼 好吃！😻
嚟到土佐呢邊一定要食かつおたたき。出發前做功課知道係高知名物，一定要試（喺宮古島食過一次真係回味無窮😆）。嗌咗わら焼きたたき丼 鰹魚半敲燒丼，超好食！鰹魚極之新鮮，口感爽口彈牙、完全冇腥味！！！配埋直七（なおしち，綠綠哋色嘅柑橘，高知縣地道特產），中和返個魚油同炭火焦香，更加帶出咗鰹魚本身嘅鮮味。正！
｜小貼士 💫
- 🚗 交通安排：店鋪有兩個停車場🅿️，如果鋪頭前面滿咗車可以喺右手邊上斜坡一撻大空地泊車
- 🕐 時間安排：只開午市 10:00～16:00， 售完即止，建議早啲嚟
- ⚠️ 注意事項：只收現金
- 💰 參考價錢：わら焼きたたき丼 鰹魚半敲燒丼 JPY 1,300（稅入 JPY 1,430）
- 🌐 官方網站：https://sengyo18.base.shop/ IG: @keiji.yamashita18