家居好物
用咗幾十年儲水式電熱水爐，都好習慣好快沖完涼，今次大裝修換返啲先進少少先🤣 師傅推介用呢隻：German Pool 德國寶GPU-6SSM 6加侖/22公升 速熱式電熱水器 (中央型) 佢機身又真係幾薄，屋企放熱水爐個位大極有限，加上前面已經係一個廁所嚟，所以個size都唔能夠太厚太大舊。呢隻薄薄哋都算係幾啱位。原本想要白色㗎，但呢隻款得黑色，襯落廁所整體顏色都算OK嘅。 熱水都熱得幾快，開咗熱水爐大約五分鐘就已經好夠熱水沖涼，比起以前嗰啲真係快起碼十倍！希望冬天沖涼佢都係會熱得快。部機都support一路開住嚟沖涼（德國寶速熱式電熱水器）。 冬天用嘅時候再畀個review 哈哈。
家居好物
呢幾排成日喺IG都見到啲人係咁煮嘢食，而且都令到我的起心肝每日都自己試下煮嘢食。有一日見到有人整嘢食嗰陣close up呢個萬用調理機，見佢又幾靚仔又好似超多功能咁，於是向某豬提出就不如呢個做入伙禮物啦！ 喺友和買有會員又平少少，扣埋啲積分前前後後都平咗成舊水，仲送多咗個玻璃容器可以替換下。 今朝用佢嚟整咗杯蜜桃奶昔，本身個桃都好腍，加埋啲奶落去打其實都好快就完成杯奶昔，大約打咗5-8秒就搞掂。佢個刀片本身好勁，所以都唔洗打好耐。最好嘅係呢部機個容器係玻璃嚟，唔洗怕會整花或者刮到啲膠。 下次整咩嘢食好？
日常
本來搵咗另一間尼泊爾菜餐廳，但點知冇開門，再搵過另一間叫LAL DURBAR Hong Kong，又係冇開門（後尾發現係google opening time 佢哋冇update過，只係有落場時間⋯⋯未開門⋯⋯） 於是去咗呢度 - Up9 Hk, 本來係出面行過見到入面好似好地道咁，上網睇下啲食物評價，欸好似唔錯咁喎！於是就貢咗入去呢間！ 雖然佢喺google寫咗係一間外賣自取餐廳，但係佢都有兩個位可以坐，又或者有多少少人想坐嘅話佢哋仲有張摺枱可以打開坐。 嗌咗以下呢三樣食物，老闆娘問要唔要辣，但我哋唔係好食得辣，所以叫咗少少辣🔥 首先嚟個Chatpate（脆米雜燴）。凍食嘅，個汁少少辣又少少酸，加埋啲生即食麵碎脆脆哋個口感好新鮮，呢碟菜式都好開胃。 呢個就成日見到嘅話都會嗌嘅波波（Pani Puri），覺得尼泊爾嘅比較好食。個汁酸酸辣辣咁又係好開胃！ 呢個chilli momo真係搞不掂，勁好食。隻momo雖然沾咗甜甜酸酸辣辣嘅醬汁，但係都保持到勁脆又香口，我哋嗌咗雞肉，隻餃子入面勁juicy又香口，大推！ 好啦今日又記住咗食過啲咩 :D | Up9 Hk
日常
睇到新聞話英仙座流星雨喺8月12日至13日超活躍兼會好容易睇到，太空館話12Aug 22:00 開始至到 13Aug 16:30 係建議觀測時段，仲預計天頂每小時出現率為100，而香港最多每個鐘可以見到流星數目係20。 去石垣島見識過咩係真實嘅太空館天象廳，抬頭滿天星星嗰種震撼程度大概呢輩子都未見過，流星雨就更加唔洗講啦。於是乎覺得想要探索一下喺香港睇星星嘅感覺係點，咁大個人喺香港長大咁耐都未試過夜媽媽去西貢為咗睇星星💫！ 揸車入到去遠遠已經見到車龍，仲見到個天勁光係咩事？？？諗住轉場㗎啦，但去到大坳門咪錶泊車位見到有好多吉位，又十分好奇嗰啲咁光嘅地方究竟係啲咩嚟，所以泊咗架車喺嗰度，然後行咗20分鐘入返大坑墩觀景台睇星星。 夜晚涼涼哋又唔係好似日頭咁熱到傻，雖然都出下汗但感覺還好。搵到個位置坐低望上天空，欸好似有好多星星咁，但啲雲時多時少，仲要個天因為啲燈搞到勁光，大概肉眼就咁睇就見到有5粒星星左右（唔係流星呀！）。觀察期間有好多飛機從四方八面咁向同一個方向飛去，一分鐘一隻咁濟，香港機場都真係幾繁忙。至於嗰啲勁光嘅燈，藍藍綠綠咁，上網睇啲人話係漁船上嘅超高功率LED魷魚燈嚟。
家居好物
裝咗個新冷氣諗住屋企仲未整好應該都好大塵，所以諗住買啲空氣濾網嚟到隔多隔。本來想買呢隻3M靜電空氣濾網用，但係$250卷真係有啲太貴了⋯⋯ 有見到有另一款幾張嘅諗住都係用住先，但係喺日本城（改唔到口啦）搵唔到。但佢個online shop又話嗰間分店有貨 😗 最後係間鋪度行多幾個圈發現到有呢卷清貨大平賣made in taiwan嘅替代品 即刻幫部冷氣貼返個濾網，希望有多一層過濾阻隔到啲微塵啦！！
日常
超juicy嘅骨付鳥🍗 上次係長沙灣鋪食過一次覺得好正，今次喺佐敦鋪再食 :D 嗌咗兩個烏冬同啲小食埋單都係$185 💰夏一烏冬(冷)＋骨付鳥＋柚子竹簾烏冬(冷)＋流心蛋＋飛魚籽凍豆腐 total $185 隻雞脾今次依然都係好juicy又超嫩滑，啖啖肉真係好正！ 柚子烏冬配埋個甜甜哋酸酸哋嘅汁，夏天食落好refreshing，啲烏冬又彈牙好吃。夏一烏冬都好出色，個汁酸酸的好開胃，食落會係咁想繼續食。最好笑我哋拎餐嗰陣聽到佢哋有外賣單，張單係要4個夏一烏冬🤣 以為呢一日未食蛋所以嗌咗蛋汁濃郁嘅流心蛋，但後尾醒起晏晝其實食咗雞蛋蒸豬肉🤣 而飛魚籽凍豆腐就舊豆腐幾滑溜，然後就諗起石垣島沖繩嘅ゆし豆腐⋯⋯ 要記低食過啲咩⋯⋯陣間又畀人話我咩都唔記得😖 推薦推薦～
家居好物
話說家裏大裝修，好多家具都需要更換了，其中要換嘅係煮食爐具。一睇⋯⋯原來啲煮食爐具係唔平（食咪唔知米貴⋯⋯）。呀媽話以前林內牌都係好耐用，唔知而家仲有冇呢？上網搵過下資料，而家煤氣公司都唔代理㗎啦，但係又搵到啲有趣嘅嘢，就係煤氣公司賣啲爐都有機會係林內廠造，睇咩型號啦。(Ref 1 / Ref 2) 今次我哋要買嘅係呢個 TGC MEGA-i2 嵌入式雙頭煤氣煮食爐 查了一下豬咪咪 再到實體店看看⋯⋯噢，是RINNAI CORP MIJ 放心購物 :D
家居好物
一開始就打算繼續使用開利，以前都一直用開，覺得都幾唔錯。但應該係因為定頻機，導致部機到達指定溫度之後停止運作一段時間，再次啟動嘅時候就會變得超嘈，會有"轟"一下嘅噪音，都影響睡眠啊⋯⋯我太醒瞓了。 為咗搵部好少少嘅冷氣機，做了少少資料搜集。 Carrier 開利CHK09EX 變頻淨冷遙控窗口式冷氣機 1匹 搵咗豬咪咪幫我總結下啲評價，感覺上不錯欸 💡 4大實用功能亮點 * 📱 智能 App 遙控： 內置 Wi-Fi，支援手機 App 控制。放工前可以遙距開定冷氣，半夜想調較溫度亦唔使摸黑搵遙控，更可自訂「睡眠溫度曲線」。 * ❄️ 一鍵自潔功能： 備有 Active Clean「雪凝洗」功能，透過結霜、溶雪過程將機內灰塵洗淨吹乾，自己搞掂日常深度清潔。 * 🍃 空氣淨化： 機身會釋放正負離子，配合三合一納米防塵網，吹出嚟嘅風乾淨無噏味，對鼻敏感人士特別友好。 * 🛡️ 雙重防銹保護：
日常
今日去咗睇ちいかわ 人魚の島のひみつ⋯⋯我冇特別留意套戲嘅影評，只係諗住不如去睇下戲輕鬆下。入戲院前朋子話呢套係恐怖片嚟，我話chiikawa喎⋯⋯恐怖片？_？好啦而家睇完就明點解係恐怖片 D: 【有劇透】覺得有啲五味雜陳，賽蓮點解要食島民係為咗搵出犯人，而個所謂犯人又做咗啲咩呢？就係食咗賽蓮其中一條小人魚。但事情點解有條人魚仔被吃了，係因為有一日呢幾條人魚喺海度玩魷魚當波踢，而有兩個島民（睇啲人稱佢哋為一葉二葉）喺度釣緊魚嘅期間，其中一個島民畀呢條賽蓮意外整到重傷，而個另一個島民醒起曾經睇過本書知道傳說中食人魚係可以得永生，於是為咗救另一半而誘拐󠄆咗條小人魚，煮咗嚟吃。重傷嘅島民吃咗人魚肉後就返生了，但係諗起自己會變成永生而其他人會因為老去而離開佢，佢就逼埋自己嘅另一半都要食呢個人魚肉，等大家都永遠在一起。故事去到最後話有彩蛋，唔寫出嚟了，睇完真係覺得呢個劇場版好黑暗有啲怕怕 D: 💡誰是誰非？邊個罪有應得？ 呢個真係靈魂嘅拷問嚟。但喺我角度睇件事就係，賽蓮冇自省。本來大支嘢咁向島民做伸手黨蝦蝦霸霸咁已經睇唔順眼，加上島民要吃咗條人魚仔都係因為佢所謂嘅"意外"整傷咗島民而引
家居好物
大裝修完要買返啲家電，廚房一定要有抽油煙機，但要買個唔熟悉嘅東西，做啲資料搜集功夫真係少不了。點為之一個好嘅抽油煙機？嘈嗎？抽力強嗎？容易控制嗎？⋯⋯尤其家中長輩年紀老邁，要搵個容易使用的好，預算有限之餘，亦因為要配合新廚櫃尺寸，所以集中睇返 長700mm 深380mm以下。 搵豬咪咪做返啲comparison 太平洋 Pacific PR-6108-U70S 煙囪嵌入式抽油煙機 * 尺寸： 闊 700mm x 深 350mm x 高 526mm * 輕觸式（兩老用嘅話還好吧？電子屏面都唔算好細） * 三段風速靜音調控：擁有低、中、高三段風速。其低速檔在維持廚房負壓排氣的同時，能將運轉噪音降至最低，煲湯或慢火煎煮時都較為寧靜（雖然見到有人話開三檔都比較嘈吵） * 強勁二極滾筒式摩打：雖然機身薄，但摩打轉速高達 2800 轉。當需要中式猛火爆炒時，能爆發強大吸力，不怕油煙倒灌