英仙座流星雨 2026

睇到新聞話英仙座流星雨喺8月12日至13日超活躍兼會好容易睇到，太空館話12Aug 22:00 開始至到 13Aug 16:30 係建議觀測時段，仲預計天頂每小時出現率為100，而香港最多每個鐘可以見到流星數目係20。

去石垣島見識過咩係真實嘅太空館天象廳，抬頭滿天星星嗰種震撼程度大概呢輩子都未見過，流星雨就更加唔洗講啦。於是乎覺得想要探索一下喺香港睇星星嘅感覺係點，咁大個人喺香港長大咁耐都未試過夜媽媽去西貢為咗睇星星💫！

揸車入到去遠遠已經見到車龍，仲見到個天勁光係咩事？？？諗住轉場㗎啦，但去到大坳門咪錶泊車位見到有好多吉位，又十分好奇嗰啲咁光嘅地方究竟係啲咩嚟，所以泊咗架車喺嗰度，然後行咗20分鐘入返大坑墩觀景台睇星星。

夜晚涼涼哋又唔係好似日頭咁熱到傻，雖然都出下汗但感覺還好。搵到個位置坐低望上天空，欸好似有好多星星咁，但啲雲時多時少，仲要個天因為啲燈搞到勁光，大概肉眼就咁睇就見到有5粒星星左右（唔係流星呀！）。觀察期間有好多飛機從四方八面咁向同一個方向飛去，一分鐘一隻咁濟，香港機場都真係幾繁忙。至於嗰啲勁光嘅燈，藍藍綠綠咁，上網睇啲人話係漁船上嘅超高功率LED魷魚燈嚟。仲光過球場燈呀大佬，點睇星星呀？😰

不過夜晚喺嗰度吹下風，休息下都幾唔錯。仲聽見有人播啲meditation music，成件事都咪話唔正呀，個腦好放鬆。見睇咗好耐都見唔到有流星，於是開咗台灣個live嚟睇，人哋嗰邊啲光污染冇咁嚴重，仲好清楚睇到超多星星，等咗陣真係見到有流星！不過係喺個mon度見到人哋嗰邊嘅流星⋯⋯但都好呀，原來流星會係咁樣喺天空劃過，一閃即逝。

大約逗留咗一個鐘就行返出去停車場拎車返屋企休息了。

新鮮嘅體驗呀。