四國 香川｜栗林公園

行完金刀比羅宮，下一站順路又舒服嘅安排，一定係搭琴電去栗林公園！雖然可以揀丸龜城，但係今次人在高松嘅時候不多，所以放棄咗丸龜城，走咗去栗林公園先。呢度號稱「一步一景」，仲攞過米芝蓮三星評價。公園地方闊落，平路超好行，而且啲松樹修剪得極之精緻。晏晝同兩老嚟散步放慢腳步啱啱好呀。

🌟 推薦度：★★★★★
🕐 是次停留時間：大約 1.5 - 2 小時
🚗 交通安排：琴電琴平線 琴電琴平站 直達 栗林公園站，落車步行約 8–10 分鐘

｜交通

喺金刀比羅宮落山後，喺琴電琴平站搭琴電琴平線，大約60分鐘就抵達栗林公園站。

• 🚏 乘車路線：琴電琴平線（往高松築港方向）➔ 栗林公園站 落車
• 🕐 車程：大約 60 分鐘
• 💰 收費：單程車費每位大人 760 日圓

大約晏晝2點幾3點入園，超多人，好多都係日本當地上咗年紀嘅公公婆婆旅行團。雖然人多，但係個公園面積都好大，人流都有所分散。

栗林公園地勢平坦，鋪得整整齊齊嘅碎石沙路非常好行，好啱同兩老漫步。啲松樹真係修剪得好靚，仲見到有工作人員爬上樹好專心咁工作。

啲池塘勁多巨型錦鯉、龜仔同水魚。然後就諗起屋企隻龜豬唔知有冇掛住我哋LOL。老豆冇啦啦對住隻水魚叫佢爬上嚟，我心諗咩料佢會聽你講咩？點知佢真係爬咗上嚟⋯⋯真係震驚咗我⋯⋯走嘅時候同佢講bye bye 落返水啦，佢又真係落返水呀⋯⋯再次震驚了我⋯⋯

慢慢行咗個幾兩個鐘，吹住微風又有個太陽曬落嚟暖暖哋，好啱瞓晏覺 😆 睇住啲湖景同松樹，身心都好放鬆。悠悠閒閒又一個下午，栗林公園絕對係四國嘅散步好地方～

｜栗林公園

• 🕐 開放時間：年中無休（開園時間隨月份日出至日落變動）
• 💰 門票價格：大人 500 日圓，中小學生 170 日圓
• 🌐 官方網站：https://www.my-kagawa.jp/ritsurin/