石垣島｜竹富島一日遊：交通、悠閒徒步散策
嚟石垣島就一定會出島！首先去竹富島遊覧。因為去竹富島嘅班次比起去其他島嶼較為頻密，大約30～60分鐘就有船由石垣島出發（兩間船公司啲時間係相隔大約30分鐘），所以都冇特別係出發前book定船飛，當日出發先喺terminal售票處購買。
｜前往竹富島嘅交通
⛴️
📍ユーグレナ石垣港離島ターミナル
落到地就去咗竹富島ゆがふ館(竹富島ビジターセンター)行咗陣，發現原來呢度有得吸日本の国立公園乃印！呢度吸嘅印係西表石垣国立公園。之前已經吸過1-2個，要喺2027年3月31日前拎哂咁多個印真係有啲難呢⋯⋯沖繩其實可以拎到三個，一個係西表石垣国立公園，另一個係慶良間諸島国立公園（不過冇去到座間味同渡嘉敷，冇得吸印仔🥲），仲有一個喺やんばる国立公園（冇去🥲）。雖然印仔就拎唔哂，但去過嘅國立公園原來都有11個，估唔到去過超過十個！
📍 竹富島ゆがふ館(竹富島ビジターセンター)
我哋嘅目的地係星星沙灘，冇租單車靠徒步，主要係自己唔係好識踩單車D: 由碼頭行到去星砂浜雖然好熱，但係慢慢行欣賞沿途風景別有一番滋味。
行行下就嚟到呢個竹富郵便局。
📍 竹富郵便局
見到有啲遊客喺入面玩緊啲印仔，但因為已經有好多人圍住咗張枱，所以都冇特別行埋去睇下係咩嚟，喺個郵便局度行咗個圈就出返嚟。
終於行到去沙灘，首先見到一隻好可愛嘅貓慵懶地扒喺地下。
📍 星星沙灘 ⭐️ （星の砂 竹富島）
啲沙真係星星樣㗎！問豬咪咪點解啲沙係星星樣，佢話係呢啲係海洋微生物嘅外殼，星砂其實唔係由岩石風化磨碎而成嘅沙粒，而係一種叫做有孔蟲（Foraminifera）嘅微細單細胞海洋生物死後留落嚟嘅碳酸鈣外殼（骨骼）。
跟住就沿住呢個星砂海岸行到去コンドイ浜玩咗陣水，出返去 お食事処 かにふ 食午餐，再搭船返石垣島。咁樣悠悠閒閒喺呢個小島上面行都咪話唔爽 🙂↔️
