四國 小豆島｜マルキン醤油記念館 丸金醬油紀念館

嚟到呢個丸金醬油紀念館，被佢吸引嘅係佢嘅醬油口味雪糕🍦。泊好車一落車嗰一下已經聞到勁香嘅醬油味，然而嗰種醬油味係有啲發酵嘅酒味同勁香豆味。兩老煮開飯已經覺得呢度嘅鼓油應該都係不得了所以就馬上行咗入去個商店睇😂

多款醬油任君選擇，可以試勻哂啲醬油揀啱自己喜歡的再購買！我見呀媽見到呢啲醬油真係雙眼發光覺得幾好笑，大概係喜歡煮嘢食嘅人會有嘅反應？但我都畀呢度嘅豉油吸引咗，因為啲香味同香港嘅豉油有好大分別。嗰隻酒香味暫時嚟講未試過喺第二度聞到過。試哂咁多種之後最尾揀咗3號，買咗支返屋企！呀媽仲話想買多幾支但係⋯⋯個喼點裝啊勁重⋯⋯

今次嚟嘅目標🎯其實係個雪糕⋯⋯醬油口味啊未試過！買咗三個雪糕一人一個再加啲醬油，奶味濃厚之餘又甜甜鹹鹹咁，真係幾好食。

擺放喺門口的醬油桶畀大家拍照。

今次冇入到館參觀因為時間都有啲晏，但係去咗隔離有個免費入場嘅見学地方睇啲醬油其實係點整，不過入到幾就見到好多超巨型嘅桶生產緊醬油，而另一邊都有介紹返啲醬油係點製造出來的。呢個area唔畀影相有啲可惜呢。

搵返少少關於呢個醬油廠嘅歷史 -

｜百年醬油之鄉（登錄有形文化財）

小豆島嘅醬油釀造歷史可以追溯到 400 多年前嘅江戶時代。當時小豆島盛產優質海鹽，加上瀨戶內海航運發達，島民利用船隻嚟運大豆同小麥，配合溫暖少雨嘅氣候，造就咗小豆島成為日本頂級木桶天然釀造醬油嘅聖地。

而「丸金（マルキン / Marukin）」創立於明治 40 年（1907 年），由當時苗羽村多家醬油釀造家合資創辦，目標係將小豆島醬油推向全日本。紀念館現址本身就係大正初期興建嘅傳統合掌造木造釀造廠，喺 1987 年（創業 80 週年）改建為紀念館開放畀公眾參觀，並於 1996 年被日本政府登錄為國家登錄有形文化財。

｜丸金醬油紀念館

🕐 開放時間：09:00–16:00（每週三休館；年末年初休館，請先參閱官網公告）
💰 門票：大人 400 日圓、中小學生 200 日圓（購票附贈特製純生醬油一瓶）
🌐 官方網站：https://marukin.moritakk.com/kinenkan/
⚠️ 注意事項：休館日不定時，去之前記得check返；醬油軟雪糕位於物產館內，無需門票亦可獨立購買