Rasonic 樂信 RW-A813ST 變頻 上置式洗衣機 8公斤 1300轉 實測
屋企換洗衣機（其實係任何電器）最怕就係買貴咗但又唔好用，都唔太想交智商稅 😂 尤其香港屋企空間有限，想搵部窄身慳位、容量夠大、轉數又要高（呀媽話洗厚身衣物尤其牛仔褲嗰啲轉數高先揈得乾啲唔會噏住呀）仲要洗得乾淨嘅上置式洗衣機（頂揭式洗衣機），話易唔易話難唔難⋯⋯上置式洗衣機其實個款來來去去都係咁，standard size（闊 400mm），主要都係睇佢洗衫得唔得⋯⋯所以今次大裝修完要買返啲電器嘅時候真係做咗好多功課。
今次揀咗呢部 樂信 Rasonic RW-A813ST（8公斤 1300轉變頻上置式洗衣機），都係睇咗勁多reviews先揀佢，喺友和買三千幾蚊包安裝，安裝師傅好細心咁幫我哋較到一個最合適嘅放置位置！部機係擺廁所，所以空間有限，仲要就返個水喉位，呢部洗衣機仔真係啱啱好咋。用咗一段時間之後真心大讚，性價比高，洗完啲衫唔單止超乾淨，連平時用開嘅柔順劑都終於發揮到佢應有嘅真正功效。可能係之前部洗衣機都真係歷史悠久（仲洗爛咗我件雪褸⋯⋯）😅
- ⭐️ 推薦度：★★★★★
- 🎯 適合對象：空間有限需要窄身機嘅家庭、追求高性價比、對洗衫潔淨度與衣物柔順留香有要求嘅朋友
- 💰 參考售價：約 HKD 3,480 （友和買，包基本安裝）
- ⚠️ 注意事項：機身闊度只有 400mm 極慳位，但記住預留頂部揭蓋高度，以及連同背後供水/排水喉管深度需預留約 650mm
｜實際使用實測體驗：柔順劑終於唔係落咗等於無落🚿
用落覺得佢啲functions做得幾好，
- 有15個洗衣程序 🧑🏽💻 其中 15分鐘快洗/運動服模式好啱我做完運動洗衫，仲可以揀幾多轉揈乾啲衫再晾乾（600/800 轉）正常洗衣模式 45分鐘，之前嗰部下下都洗成個鐘，我成日都諗其實係咪有咁嘅必要？日式嗰啲都係洗 30分鐘⋯⋯？
- 柔順劑100%發揮功效 🌸 以前用舊款洗衣機，明明每次都有落足柔順劑，但洗完出嚟啲衫一啲都唔香，毛巾仲係硬掘掘好似無落過柔順劑咁。但係呢部機喺最後過水階段釋放柔順劑嘅時間同埋轉動配合得好好，洗完拎出嚟嗰下，啲衫真係又軟熟又香噴噴，柔順劑終於發揮到佢真正嘅價值。
- 有600/800/1000/1300 轉變頻脫水，乾衣超快 🌀 不過我就未用到去 1300，平時洗牛仔褲用800都好夠，可能遲啲喺回南天潮濕天氣嘅時候就有需要用到1000/1300轉去揈乾啲衫先晾。
｜選購與安裝小貼士 💫
買上置式洗衣機之前，度機身size係唔夠嘅，要睇埋包括供水管、排水管夾埋嘅尺寸，同埋你屋企自己本身條水喉有冇頂住個洗衣機蓋，上置式嘛個洗衣機蓋要向上打開，如果個水喉頂住哂就要預返啲位部洗衣機可能要擺出少少🤏
｜樂信 Rasonic 變頻上置式洗衣機
- 📐 產品型號：RW-A813ST
- 💰 參考售價：HKD 3,480（友和，包基本安裝）
- 🔧 主要規格：8公斤容量｜最高 1,300 轉/分鐘｜變頻摩打｜1級能源標籤
- 🌐 官方網站：https://www.shew.com.hk/chinese/brand/rasonic/living/washing-machine/rw-a813st.aspx
（本文只係普通日常生活小感想，冇收錢賣廣告）