四國 小豆島｜寒霞溪

四國寒霞溪係睇紅葉 no.1 嘅地方，不過嚟嘅時候仲係青葉哈哈。之但係由山頂望返落去瀨戶內海，廣闊嘅視野真係令人心情舒暢，頭腦都舒服咗好多。相信秋天睇紅葉嘅季節一定逼爆人🙂‍↔️

｜交通 自駕 泊車 🚗

到達小豆島之後第一個景點就係嚟呢度睇景。喺ORIX拎咗車之後就揸到嚟紅雲亭停車場，打算由山腳搭纜車上去山頂。

🅿️ 停車場 - 寒霞渓ロープウェイ紅雲亭駅

泊好車之後可以喺呢度上去車站買飛，搭纜車上去寒霞溪山頂。⛰️

唯一能「同時眺望天空、大海與溪谷」的纜車。呢個時間竟然冇人上嚟（其實更多嘅人係直接上咗山頂，旅行團呀嗰啲會選擇山頂搭返落嚟睇海陸空嘅景），所以我哋一家包咗架纜車🚡。

｜寒霞溪歷史小故事 📜

寒霞溪同大分縣耶馬溪、群馬縣妙義山並列為「日本三大溪谷美景」，亦係日本最早被指定嘅國立公園（瀨戶內海國立公園）核心地帶。成個溪谷係大約 1,300 萬年前火山爆發之後，歷經風雨、地殼變動長年侵蝕雕琢出嚟嘅天然奇觀。 不過「寒霞溪」喺古代唔係咁叫㗎。喺明治時代之前，呢度一直被稱為「神懸」（かがけ / かぎかけ）。古時相傳因為呢度嘅懸崖峭壁實在太過險峻陡峭，修驗道行者同採藥人必須要用繩索吊掛鐵鉤爪先至可以勉強攀爬上去，所以叫「鉤懸」；另一傳說則係應神天皇巡遊時，曾喺險峰之間拉起鉤鎖攀登，因而被奉為神聖之地「神懸」。 直到明治 31 年（1898 年），著名儒學者藤澤南嶽嚟到遊覽，被眼前雲霧繚繞、滿山紅葉同奇岩絕壁深深震撼。佢覺得「神懸（Kagake）」個讀音同漢語「寒霞溪（Kankakei）」極為相近，加上秋冬時分深谷寒霞籠罩、詩意盎然，於是就將佢改名為「寒霞溪」⋯⋯自此呢個典雅嘅名就流傳至今⋯⋯

呢個係消災擲瓦片（かわらけ投げ）用嘅瓦片。要投擲嘅目標其實都好遠⋯⋯唔好以為望落好近其實個距離都真係有返咁上下。有5次機會！大家各人掟咗一次之後仲有兩塊，於是同老豆各自再掟一次。

最尾一次大約知到個力同角度應該要點掟，向前嘅拋物線係冇可能入洞，其實個掟法似係玩啲回力鏢咁要有個弧度。差少少就入洞啦！😫 呀媽話要唔要再買嚟掟，哈哈試過就好了！

之後去咗睇之前瀨戶內海藝術節嘅展品。2025年想嚟睇㗎但係因為實在太忙碌了放棄咗。2028年一定要嚟！

記得去埋呢個造價一億日圓嘅廁所😆 全日本最貴⋯⋯！

| 寒霞渓トイレ（1億円トイレ）

都行咗粒幾鐘，仲有好多地方都未行哂因為真係好大。食咗個lunch之後就搭返纜車落山。

｜寒霞溪

🕐 開放時間：山頂展望台 24 小時自由開放；寒霞溪纜車 08:30～17:00（依季節微調，每 12 分鐘一班）
💰 門票：山頂展望台免費參觀；寒霞溪空中纜車來回成人約 2,160 日圓、小童約 1,080 日圓
🌐 官方網站：https://www.kankakei.co.jp/
⚠️ 注意事項：山頂氣溫比平地低約 3 至 5 度且山風較大，建議帶備輕便防風外套；秋冬紅葉旺季纜車排隊人潮較多，建議早上提早出發