西表島｜バラス島半日浮潛🤿

成個trip第一日嘅出海浮潛搵海龜！好期待可以見到海龜，加上天氣勁熱真係好想快啲跳落大海玩水 :D

西表島其實真係好多嘢玩同睇。屬於世界自然遺產嘅西表島（Iriomote-jima）係沖繩縣八重山群島中最大嘅島嶼，亦係沖繩第二大島，僅次於沖繩本島。全島有超過90%嘅面積係亞熱帶原始森林同紅樹林覆蓋，保留咗極原始嘅大自然面貌。島上面仲有隻極度瀕危物種 - 西表山貓。我今次就無緣見到佢了，網上面見到啲相都覺得佢哋好得意。另外，西表島有好多戶外探險活動，鐘意上山下海嘅你一定要鐘意呢度 :D 不過今次嘅旅行目的係chill chill，雖然真係好想去玩獨木舟＋行山睇瀑布，但係唔想chur爆一個身心俱疲嘅另一半，所以揀咗呢個バラス島半日浮潛🤿

|【半日】在奇蹟之島與海龜共游！巴拉斯島船浮潛

如果你係西表島住一晚第二朝再join呢個tour，應該可以慢慢地吃埋個早餐，再慢慢地去上原港集合。chill chill 😎 不過今次我哋就由石垣港出發，所以要搭到8點船先可以準時9點喺西表上原港集合。有諗過其實8點船係咪都夠呢，要唔要再早一班呢？因為船程都要50分鐘。但早一班就7點要出發，又好似太早，所以email咗adventure PIPI確認一下係咪8點船都可以。收到回覆話8點冇問題的可以趕得切，於是就安心咁book咗船飛！

落咗船之後去集合點度搵返我哋個guide，碼頭一大清早已經勁多adventure pipi tour guides 等候大家出海！搵到我哋個guide 叫 Karin，英文超好，一身古銅色真係好正。但我喺隻船度瞓到傻咗，個人仲未瞓醒又迷下迷下咁，人哋問我嘢我都load唔到😆。報到嗰陣會叫你scan QR code打開張consent form填，填好之後就去個洗手間再出發！

首先會去架van仔度換好啲助浮衣同埋marine shoes。拎支水，電話同埋個GO ULTRA，其餘物品放低喺adventure PIPI架van仔度。佢哋會有鎖鎖起架車，所以都唔洗太擔心啲個人物品會唔見。然後就行去搭船仔出去搵海龜了！

Karin見我哋帶咗電話出去，雖然有個防水袋，但都建議我哋放低擺返喺船度，唔好拎落海以免陣間甩咗唔見咗。到咗バラス島，但因為朝早未水退，所以個島喺水底但都叫掂到地。跳船落海嗰下真係好爽！Karin帶我哋去個島度影咗啲相，然後又帶我哋去睇唔同嘅魚。有問過呢日見到海龜嘅機率，好可惜係得30%。結果我哋就係嗰70%😗 個海嘅顏色超靚啊，Karin仲同我哋講嗰啲藍色嘅魚（上網搵過應該係叫Parrotfish 鸚哥魚）拎嚟做刺身好好吃，但係佢咁嘅色⋯⋯真係吃得嘅咩？（係食得嘅⋯⋯係MaxValu/市場見到佢變成刺身的樣子⋯⋯）

一齊落水嘅guide除咗Karin都仲有兩個，會一齊睇住大家嘅安全，都可以話玩得好安心放心。

開心嘅時間過得好快，浮潛咗兩個spots左右就上返船搭返去adventure PIPI office度沖涼（咁就沖水的，冇任何洗頭水同沐浴露，亦唔畀用因為要保護返個海洋）。主要係沖走啲海水換返啲乾嘅衫搭船返石垣島。但上返船發現勁急尿😖，後來google咗一下先知呢啲係好正常嘅現象，叫浸入性利尿。急到個膀胱就嚟爆咁樣😫

海龜0隻～

去完今次嘅tour之後，真係經一事長一智。

我哋join咗朝早9點嘅團，其實水就未退，所以個島就完全係水底。係掂到地但係水都深㗎，係個頭啱啱好係水面。石垣島、宮古島大約晏晝2點幾3點啲水會退到勁乾。

建議揀咗你想參加tour嘅日子之後，有位嘅就請先去book船飛再返嚟book tour。原因係夏季去西表島嘅人超級多，網上勁快賣哂啲船飛。雖然佢話現場都可以即時買飛但只有少量，船位有限呀，仲要啲班次唔係好密，錯過咗一班就catch唔到tour個集合時間！

我就係因為諗住過一日先book都冇問題啦，點知第二日船飛online已經冇得再賣，但個tour就都仲有位。都擔心去到碼頭先買船飛會太抆水，所以為求玩得開心就改咗日子先join tour，make sure online買到船飛先！

據呢次嘅半日浮潛之後，我哋都醒水咗之後啲tours/出海活動都唔洗帶好多嘢。

石垣島宮古島沖繩嘅tour多數都係會將你啲personal belongings 鎖咗係車，個人覺得都算係安全同放心的。

｜咁參加呢啲tour帶啲咩出去就夠呢？

啲tour本身就要求大家要着好泳衣先，因為唔會有時間畀大家換衫。所以要帶嘅嘢就只係

• 足夠嘅水（好重要，大熱天時出勁多汗雖然係落咗水濕咗唔覺，但身體係會缺水）
• 錢（如果你未畀團費，現金/credit card 佢哋都收，視乎個guide，佢哋會講清楚的）
• 毛巾（唔洗太大條，夠抹乾個身就OK）
• 一套乾嘅衫褲、內衣褲（如果你要搭返船往返啲島嘅話）
• 電話
• 運動相機
• 搵個防水袋入起哂以上嘅嘢佢（decathlon嗰啲都好夠用了）

如果啲tour唔洗搭船嘅話多數都係直接喺碼頭集合就車你出去玩，就算濕咗身佢哋架車都有哂啲防水墊，直接返酒店沖涼都已經好OK。所以帶個人同支水去其實都已經足夠😆

｜バラス島

〒907-1544 沖縄県八重山郡竹富町島附近