石垣島美食｜ひとし 本店

話說嗰日問咗個tour guide小哥石垣島有咩係必吃，佢話食咗ひとし未，呢間係全石垣島最好吃嘅居酒屋，務必要去試試。於是我哋嗰日試去walk in，係冇可能嘅，一定要預約先可以。所以即場book咗第二日嘅16:30（冇啦實在太full只有呢個時間）。同埋行程上都可以安排到所以唔理啦一定要試下呢間居酒屋！！！

16:15店外已經超多人等候食第一輪，真係都幾誇張。用膳時間係一小時，雖然好似有啲趕⋯⋯！但係美食當前應該都好快清哂。

呢幾日浮潛嘅時候已經成日聽見啲tour guides指住啲藍色嘅鸚哥魚話做刺身好好食⋯⋯本來我喺水底見到條魚藍成咁⋯⋯真係食得嗎？上網搵過啲人話佢哋係珊瑚魚對海洋好有幫助其實唔應該食⋯⋯但係好奇心驅使又想知其實係咩質地⋯⋯所以叫咗兩件壽司🍣⋯⋯！

好啦就係佢，啲皮嘅口感都幾韌，魚肉就爽的，但我食落就冇咩好特別，未必會想翻兜嘅魚類。試下就好。

刺身呀，海葡萄啦，壽司啦樣樣都勁新鮮。見隔離枱嗌咗個好吸引又好creamy嘅麵食但又唔知係咩嚟，於是問咗店員係咩菜式，係海膽素麵！馬上加單叫埋呢個。嚟到嘅時候真係超香濃嘅海膽味，個湯勁creamy，夾埋啲素麵食真係一流！

因為上菜都用咗啲時間，真正食到嘢嘅時間大概只有半個鐘，上埋呢個海膽素麵我哋都已經極速咁食，店員就已經過嚟話要交枱了。隔離枱有人打包拎走啲食剩咗嘅食物，而我哋大部份都叫清哂，係呢個麵就真係冇咩可能帶走，所以再食多兩啖就還枱了。有啲可惜。

下次有機會再嚟要諗下有咩策略🤣

｜ひとし本店