石垣島｜石垣御神埼灯台戶外360度天象影院⭐️
吃飽晚飯就揸車去睇星星。石垣島有好多好地方都可以觀星，查下就發現佢哋好保護環境，有嚴格嘅光害防止措施，例如全島嘅路燈換哂係完全向下照射，防止光線向上等等⋯⋯西表石垣國立公園（石垣島係屬於呢個國立公園㗎）係獲認證為日本首個星空保護區！
揸咗半個鐘左右就到咗燈台。沿路冇咩街燈，真係靠自己部車兩個高燈嚟到行車，中途都有遇到啲小貓橫過馬路。所以揸車真係要好留神。燈台下有個無料駐車場，亦有洗手間。搵個位泊低架車就摸黑行上去燈塔（就咁手機電筒其實都夠）。個燈塔每隔10秒就着一次燈，但完全唔影響影星空同睇星星。
⭐️⭐️⭐️ 一抬頭，真係嚇親我，未見過如此多嘅星星！！！⭐️⭐️⭐️
張相唔係我搵張黑底紙同白色筆篤啲星星出嚟㗎⋯⋯真係一抬頭就震驚了我的多星星到一個點，仲有見到少少星雲/銀河（？）影相都唔能夠畀大家睇到究竟佢有幾震撼，肉眼睇到真係超驚喜（好彩有帶眼鏡去睇到每一粒都清清楚楚，除咗眼鏡只係見到啲星星散開⋯⋯）
加上嗰日係初五，啱先新月又冇乜雲遮住，真係實在太幸運🍀
環境夠哂黑暗，觀星真係一流。加上微風輕輕咁吹下吹下，真係好想直接瞓喺地下仰望住個星空。我哋研究咗好耐點樣留得低呢個景色，但之後都覺得其實不如靜心欣賞好了，於是喺嗰度留咗三個鐘先離開。
強烈推薦大家去石垣島一定要去觀星，你一定有所驚喜。
題外話：回程嗰陣跟咗個google map行咗入個小徑度，好彩前面有架車開路，有段路直頭係打完風之後啲樹倒塌哂差啲行唔到 🤣 google map又係度帶人行小路⋯⋯