石垣島美食｜とうふの比嘉

話說某人好鐘意食豆腐（？）我都好鐘意食豆腐料理，所以喺plan行程嘅時候見到有呢間超人氣嘅豆腐料理店就馬上bookmark咗。聽聞係要倒屎咁早去到先有得食，我哋6點半去到都已經遲咗啦（雖然google map寫佢6點半開門），已經有早一轉嘅客人享用緊早餐！於是我哋等咗大約半小時就有位。去遲少少都冇位泊車呀⋯⋯

嗌咗兩個套餐：

1. ざくざく豆腐
2. 定番！ゆし豆腐セット

ざくざく豆腐唔係set嚟，所以係冇飯嘅，我哋加咗個小碗飯。明太子醬加埋紫菜，鹹鹹哋同嗰種鮮味，夾埋個清淡嘅豆腐，味道剛剛好！ゆし豆腐係未經壓實成形嘅豆腐嚟，所以佢唔會好似啲豆腐磚咁樣咁實，反而係鬆鬆軟軟又好滑溜，好似豆腐花咁。呢個ゆし豆腐嘅豆味好濃郁，而且有少少燶燶哋嘅味道，正常㗎，係ゆし豆腐嘅特質嚟，係一種煙燻焦香味。

而定番！ゆし豆腐セット就更為清淡，基本上都冇咩調味，係啖口好多。但豆味香濃，熱辣辣咁用嚟送飯都好好吃呀。豆漿一樣都係超濃豆香，鐘意豆腐料理嘅人一定會鐘意呢度。

呢個早餐係大滿足！

題外話：google map又帶我哋抄小路入去，明明有大路唔行就係行小路⋯⋯望咗幾望確認呢條真係可以行嘅車路嚟先入去，好彩最後係去到目的地 🤯

｜とうふの比嘉

營業時間：06:30～10:00，逢星期日休息（記得早啲去）