石垣島｜米原ビーチ🏝️
一大清早食完早餐就去米原ビーチ玩水 :D 個沙灘好大，設施齊備。唯獨夏天真係超多人去呢個海灘，最近沙灘嘅停車場係一早爆滿。於是我哋去個遠少少嘅地方，唔知係咪臨時停車場嚟（喺google map搵唔到）。
💡
夏天好難搵位泊車，但附近停車場都多（臨時），大家收費差不多
1000円可以泊全日，500円2小時。
1000円可以泊全日，500円2小時。
夏日熱辣辣即刻跳落水消一消暑。啲水超清呀，帶個浮潛goggles同助浮衣落去就可以睇珊瑚同魚！冇呢啲裝備嘅話喺米原海灘都有得租借。不過嗰日都幾大風💨 玩玩下水有個小意外：我手持嘅水泡甩咗手，然後佢隨水漂流加上大風佢走得勁快，已經追唔切佢⋯⋯係度諗緊死啦變成海洋垃圾嘅時候，好彩！！！佢吹咗去遠處嘅一群外國人度，佢哋游咗過去執返個水泡，然後我哋去咗問佢哋拎返同感謝佢哋嘅協助！當我哋拎返個水泡返緊埋岸嘅時候，就有另一群小伙子玩嘅沙灘波又吹咗落海然後愈吹愈遠執唔返⋯⋯😐
玩咗幾個鐘⋯⋯曬到勁黑 😆 跟住就去沖身換衫，離開米原ビーチ前往下一個目的地：川平公園展望台。
💡
沖身室有三大格，100円一個人，喺隔離嘅小士多付款後排隊使用。每個沖身格入面都有乾衣籃可以放個人物品。