宮古島｜17END 睇飛機降落
落咗機即刻搵接載我哋去Times拎車嘅人，但眼見其他租車公司嘅職員都帶住佢哋嘅客人離開，我哋都仲未搵到Times嘅職員。有少少心急係因為要趕喺啲航班降落時間衝去17END睇飛機！好在等多陣就有人嚟接我哋。 拎到車之後就馬上驅車前往機場下地島17END。呢邊就係宮古島另一個機場 - 下地島空港，建築物好有特色好靚，好似藝術館。沿路經過伊良部大橋，風景超美，宮古藍真係令人感到超放鬆嘅藍色。同石垣島嘅藍又係好唔同，宮古藍係偏綠少少，係最鐘意嘅綠松石色！ 嚟到17END，就見到震驚了我的宮古藍！ 海水嘅澄澈度，講真咁大個都真係未見過，仲要係呢隻綠松石，真係冇哂抵抗力。喺石垣島未見到嘅海龜，嚟到宮古島就即刻見到！雖然只係遠處見到佢哋浮上水面抖氣，都已經超興奮！ 但睇咗好耐個大海差啲唔記得其實我哋嚟呢度係要行到最入睇飛機降落。點知已經有隻飛機飛緊埋嚟，於是拔足狂奔，只能夠講飛機真係超快😆 第一隻飛機只能從佢嘅側面睇住佢降落。好彩仲有一班飛緊過嚟，於是急急腳咁走去盡頭度搵個位欣賞。 💡可以喺呢個下地島空港官網可以睇到當日到達嘅航班時間 睇完飛機就搵咗個位坐咗陣繼續睇住呢個好靚嘅大海。